Լա Լիգայի 35 - րդ տուրում կայանալու է Կատալոնիայի դերբին, որից առաջ մամլո ասուլիսի է ներկայացել Լուիս Էնրիկեն: Ներկայացնում ենք առավել հետաքրքիր հատվածները:
"Այն փաստը, որ այս խաղը դերբի է, արդեն յուրահատուկ է դարձնում հանդիպումը: Մրցաշարային աղյուսակը նշանակություն չունի, մաքսիմալ բարդ և ինտենսիվ խաղ է լինելու":
"Ալ - Տանիի խոսքերը մեկնաբանելու ոչ մի ցանկություն չունեմ: Առաջիկա հանդիպման հետ առնչություն չունեցող հարցերի շուրջ խոսելն օգուտ չի բերի":
"Նեյմարը շատ լավ վիճակում է և պատրաստ է խաղալ վաղը":
"Ինիեստան որոշակի խնդիրներ ունի, վաղը կտեսնենք, թե արդյոք նա պատրաստ է խաղալ":
"Գոմե՞շը: Միշտ փորձում եմ գոտեպնդել և օգնել խաղացողին հաղթահարել դժվարությունները: Բոլորն էլ հայտնվում են տարբեր իրավիճակներում, մանավանդ ակումբում անցկացրած առաջին տարում: Որքան քիչ հրապարակայնորեն քննարկեն խաղացողին, այդքան լավ":
"Այս պահին բոլոր խաղերն էլ առանցքային են: Պետք է հաղթել մնացած բոլոր հանդիպումներում":
"Նեյմարը սեփական էմոցիաները կառավարելու մասնագետ է, նա շատ հարվածներ է ստանում ոտքերին: Նա հազվադեպ է հեռացվում, քանի որ շատ լավ է ղեկավարում իր հույզերը: Վաղը բարդ խաղ է, որում էմոցիաները վերահսկելը կլինի առանցքային և անհրաժեշտ":
"Ինձ չեն անհանգստացնում Սուարեզի ցուցանիշները, պետք չէ նայել միայն գոլերին: Նա կարող է որոշ խաղերում ավելի կամ պակաս դիպուկ լինել, այդտեղ անհանգստանալու ոչինչ չեմ տեսնում":
"Փորձում ենք օգտագործել հեռահար հարվածները: Տուգանային հրապարակի ներսում գոլ խփելու հնարավորություններն ավելի մեծ են, քանի որ ավելի մոտ ես դարպասին: Մեր դեմ խաղացող "փակ" թիմերին "բացելու" շատ եղանակներ կան: Շատ բան կախված է կոնկրետ ֆուտբոլիստի կարողություններից":
"Ալեյշը շատ լավ է իրեն զգում, սպասվածից ավելի լավ է: Նա ահռելի քայլերով է շարունակում իր ապաքինումը: Ամեն ինչ կախված է նրա ապաքինման արագությունից: Նա ծանր վնասվածք էր ստացել և այս պահին ակնհայտ է միայն մեկ բան՝ նա կվերադառնա":
"Բոլոր արտագնա խաղերն էլ բարդ են: Կփորձենք մեր ունակությունների շնորհիվ հաղթել: Մրցակիցը շատ լավ գիտի մեզ և ունի լրացուցիչ մոտիվացիա՝ մեր դեմ խաղալիս":