Բարսելոնայի մարզական տնօրեն Ռոբերտ Ֆերնանդեսն այսօր վերջնականապես հաստատել է, որ մինչև ամառ կատալոնական ակումբը նոր ձեռքբերում չի ունենա:
Ալեյշ Վիդալի ծանր վնասվածքից հետո, համաձայն Լա Լիգայի կանոնակարգի, Բարսելոնան կարող էր թիմ հրավիրել ազատ գործակալի կարգավիճակ ունեցող ֆուտբոլիստի կամ խաղացող գնել Իսպանիայի առաջնությունում հանդես եկող թիմերից:
"Մենք ոչ մի տրանսֆեր չենք կատարի, զրկվել ենք Ալեյշից, բայց ոչ ոքի չենք գնելու", - հայտարարել է Ռոբերտ Ֆերնանդեսը, հաղորդում է իսպանական Sport - ը:
Նա խոսել է խաղի մասին. "Հետաքրքիր և բաց հանդիպում էր: Դեպորը հոյակապ խաղաց և ես շնորհավորում եմ նրանց, բայց մենք նույնպես լավ խաղացինք, միակ տարբերությունն այն է, որ չունեինք նույն տրամադրվածությունը, ինչ մյուս խաղերում":
"Չեմ ցանկանում արդարացումներ փնտրել: Նման արդյունքը պետք է առանձնահատուկ վերլուծել: Մենք լավ խաղացինք, բայց պետք է նաև ընդունել մրցակցի արժանիքները: Կար մի պահ, երբ 2 թիմերն էլ կարող էին հաղթել, մենք գնացինք հաղթանակի հետևից, իսկ դա միշտ էլ վտանգավոր է, բայց մենք պետք է անեինք դա", եզրափակել է Ֆերնանդեսը: