Ինչպես հաղորդում է SPORT - ը, Բարսելոնան պաշտոնական առաջարկով դիմել է Պալմեյրասին, Գաբրիել Ժեզուսի դիմաց առաջարկելով 19 մլն եվրո:
Բարսելոնան լրջորեն հետաքրքրված է Պալմեյրասի 19 - ամյա հարձակվող Գաբրիել Ժեզուսի ծառայություններով, ում Բրազիլիայում շատերն անվանում են 2 - րդ Նեյմար: Կատալոնական ակումբը տաղանդավոր ֆուտբոլիստի դիմաց առաջարկում է 19 մլն եվրո և ևս 5 մլն եվրո` կախված նրա հետագա ելույթներից:
Ակումբի ֆուտբոլային տնօրեն Ռաուլ Սանլյեհին, ով ժամանակին հաջողությամբ բանակցել էր Սանտոսի և Նեյմարի գործակալների հետ, այս օրերին գտնվում է Բրազիլիայում և շատ հավանական է, որ հենց նա է բանակցություններում ներկայացնելու կատալոնացիներին:
Բարսելոնայի ու մի շարք առաջատար այլ ակումբների համար, համաձայն պայմանագրի, Ժեզուսի հրաժարագինը կազմում է 24 մլն եվրո (մնացած ակումբների համար ավելի բարձր է), ինչը հեշտացնում է բանակցությունները: Սակայն, բացի կապտանռնագույններից, եվրոպական այլ գրանդ ակումբներ նույնպես փորձում են ձեռք բերել Գաբրիելին:
Ինչպես Նեյմարի դեպքում էր, Ժեզուսի դեպքում նույնպես նրա տրանսֆերային իրավունքների միայն մի մասն է (30%) պատկանում ակումբին` Պալմեյրասին: 55% - ը պատկանում է ֆուտբոլիստի գործակալներին, իսկ մնացած 15% - ը` հենց ֆուտբոլիստին: Հարկ է նշել, որ հաջորդ տարի Ժեզուսի հրաժարագինը հասնելու է 40 մլն եվրոյի և հենց այդ պատճառով են եվրոպական գրանդ ակումբները շտապում այս հարցում: